Psa 135 | YON | STEP | Yariman ye aningko kankoonime! Yariman ye aningko kankoonime, Yariman ye demedan, ye aningko kankoonime.

Psalms 135

Yook 135

1 Yariman ye aningko kankoonime!
Yariman ye aningko kankoonime,
Yariman ye demedan, ye aningko kankoonime.
2 Kane kane kuuYariman yambiwoom awunimaibdan,
nub God yambib yu kuuk wirinimbon aom dobirimaibdan kui,
3 yiib kuuYariman ye aningko kankoonime,
amborom kuu ye kuu amun kowe.
Ye aningko yaa kubi yook wingkime,
kukuu manimanandeb yeman kowe.
4 Kedi,Yarimanbed yeka ye dowad Yekob kuu kine baamonoon,
Israel kuu ye yaa bobne komboroon ye karub ande nendooneYariman yeman keroon kui.
5 Nekaad,Yariman kuu miin darewoob arimbed.
Nub Yariman kuu miin darewoob arimbed, god yena korem arebban.
6 Yariman kuu komo komo ye dowaken kerimaan yaamo kwane ambangkimaan,
ambid aomiib okad ariyiib karamok ariyiib karamok niindem yiriyiib korem yaa.
7 Yembed wiib kuu ongmaane okad yimin yimin yaambed daanimaib,
kwane yembed am kuu imakiib ongmimaan,
kwane yembed nuub kuu ye angkimbirimbon aombed nenkowaana minimaan kii.
8 Yembed Idyipdan yi wonob dana meed yenbandoone dukniwen,
nimakarub yi wonob dana meediib dingkan yi wonob dana meediib kui.
9 O Idyipdan, yiib kingiib ye korok korokiib yaa kuu yembed manmo kerene
dudiib binangke ye yaa anam andi yemaniib kuu yiib aom ongmenaboon.
10 Yembed ambibkin yemoon yeene monmaroon,
kingdan aromkonoyiib kangkon yeene nongkoboon,
11 Amorodan yi king Sihoniib
Basandan yi king Ogiib
okad Keenan ye ambibkindan yi king koremiib kui.
12 Kwane yembed okad kuu ye nimakarub yaa kondoone yiman keroon,
Israeldan yaa kondoone yiman keroon kui.
13 OYariman, ewaningko kuu aron korem kwane angkimbaraneen,
oYariman, eb yirin kangkon nimakarub yaro dobere dobere yaro wananiib korem aom kuu kwane angkimbaraneen.
14 Amborom kuuYarimanbed ye nimakarub yi dowad wengyundekore yi kuu ambarakmindo andaneen,
kwane ye demedan yaa mimyob keende awandaneen.
15 Ambibkin yena korem yi god kuu kuruwakmo, silvaayiib goldiib kumbed
karub yi dingkimbed ongmenabiwen.
16 Yi kuu mongkodkonoyiib kumban dakmindeban,
kwane yi kuu indowiib kumban wedmindeban,
17 kwane yi kuu kerendemiib kumban wengambirindeban,
kwane yi kuu inum ma nimokban.
18 Kuruwak god ongmenabimaibdan kuu yika ongmenabiwen yeman kwamune areb keraniib,
kwane kane kane kuruwak god yaa angkumone doriib kangkon yi areb keraniib.
19 O Israel ye awoya ari,Yariman yaningko kankoonime.
O Eeron ye awoya ari,Yariman yaningko kankoonime.
20 O Livai ye awoya ari,Yariman yaningko kankoonime.
Kane kaneYariman yaa une bumangkimaib kuu,Yariman yaningko kankoonime.
21 Saiyon arimbedYariman yaningko kankoonime,
Yerusalem aom doreenman yaningko kankoonime.
Yariman yaningko kankoonime!